نرحب باعضائنا الكرام وبالزوار ونتمى دوماً ان تجدوا مايسركم ويمكنكم التواصل مع المشرف تمام على واتسب وجوال 0505662861 لاي استفسار او مساعدة في الموقع

 

تنبيـــــه هـــام

دعماً من ادارة الموقـع فقـد تـم خفـض سعي المنتدى الى ١٪ على البائـع

ومن يواجه اي مشكلة في التسجيل التواصل على بريد الموقع aghnam@gmail.com

ضع إعلانك هنا


[  ] [ عدد مرات العرض 333310932 ] [ عدد النقرات 69585 ]

صفحة 1 من 2 12 الأخيرةالأخيرة
النتائج 1 إلى 15 من 21

الموضوع: كيف تكتب قصيده شرح مبسط من 7 أجزاء

الجزء الاول كيف تكتب الشعر بسم الله الرحمن الرحيم نظرت إلي بعض الكتابات حول نظم القصيده وجدت انه بالاضافه إلى الأخطاء العديده في هذه المواضيع أنها

  1. #1
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17

    كيف تكتب قصيده شرح مبسط من 7 أجزاء

    الجزء الاول

    كيف تكتب الشعر

    بسم الله الرحمن الرحيم


    نظرت إلي بعض الكتابات حول نظم القصيده
    وجدت انه بالاضافه إلى الأخطاء العديده في هذه المواضيع
    أنها تتسم بالتعقيد للشاعر المتمكن قبل المبتدئ او من لديه رغبة لتعلم النظم

    وبعد الاستعانه بالله

    سأبدأ هنا سلسله مواضيع بعنوان

    ((تعلم الشعر بسهوله))

    وهي اجتهاد شخصي بحت ابتعدت فيه قدر الامكان عن التعقيد
    وابتكرت بعض الامور وكتبت أبيات وقصائد خصيصا لتوضيح بعض النقاط فيه

    وستكون مواضيعنا كالآتي :

    - كيف تكتب القصيده ؟؟ - ضوابط مهمه للكتابه - خطوات عمليه لكتابه القصيدة
    - الفكره والقصيده - ماهي القافيه ؟! - المفرده واهميتها - الوزن بشكل صحيح

    هذه السلسله موجهه لمن لديه رغبه حقيقيه ليتعلم نظم القصيده المقفاه الموزونه
    وكذلك سيجد من يجيد الوزن والقافيه مايفيده ولن أطيل أكثر بالمقدمه
    وأرجو ألايبخل أحد بملاحظاته أوتساؤلاته كيف ماكانت

    وباسم الله نبدأ

    الموضوع الأول (وهو مدخل لباقي المواضيع )


    كيف تكتب الشعر؟؟؟


    تحتاج الي:
    1- فكره

    2- مفرده (حاول تكون المفردات اللي تستخدمها سهله ومفهومه ولاتعقد الامور)

    3- قافيه ( لاتفكر فيها في البدايه راح تجي بروحها بس بعد البيت الاول التزم علي الاقل بالحرفين الاخيرين )

    4- وزن ( لاتحاتي )


    الخطوات:

    1- اختر الفكره:
    مثال :
    ( ابي اكتب للمنتدي ومولاقي كلام اقوله)
    شلون اصيغ هالفكره ؟!؟!؟؟!؟!
    اسال نفسي سوال شنو ممكن اقول؟!؟!
    شلون ابدا ؟!؟!؟!
    وشنو القافيه اللي اختارها ؟!؟!؟

    - اجاوب
    اول شي انسا مساله القافيه راح تجي بروحها
    اهم شي فكر باللي ممكن تقوله حتا الوزن انساه
    وعبر عن اللي بخاطرك !!!!
    شلون ؟؟؟!
    انت ودك تكتب للمنتدي بس مو لاقي كلام تقوله
    قول مثلا :
    ودي اكتب لي كلام ومالقيت اللي اقوله ؟؟!؟!!!
    بدايه لشطر بيت حاول تكمله بنفسك
    المطلوب انك تسترسل بالكتابه بس
    لاتنظر للوزن في البدايه
    الوزن راح يظبط مع الممارسه
    بس شلون اظبطه من غير تعقيد او التزام بالتفعيله وبحور الشعر مثل



    فاعلاتن مستفعلن فاعلاتن
    او
    فعلن فعلن فعلن فعل
    وهلم جره

    الاجابه سهله
    في البدايه حاول تغنيها واذا جت بالغناء سهله وسلسه
    فهي اقرب انها تكون موزونه

    وحاول باغاني مثل :

    لمني في محجر عيونك لراشد الماجد
    او حبيبتي وحيات قلبك وعينك لاحلام وميحد حمد

    او اسمحيلي يالغرام لمحمد عبده
    او تناسيني بنفس الموعد اللي به ذكرتيني لمحمد عبده

    وانا اخترت هالاغاني بالذات لان كل وحده فيهم تخدم وزن معين

    ومو بالظروره هالاغاني

    الاغنيه اللي تبيها
    المهم شيلها بطاروق تفضله وترتاحله


    بالنسبه للقافيه
    حاول تكون نهايه البيت من حرفين او اكثر


    مثال 2 :

    (ودي اكتب قصيده في حب الوطن الكويت )

    شلون اصيغها ؟!؟!

    انت تحب الوطن؟!؟!
    قول مثلا

    ودي اكتب لك قصيدة حب ياكويت وماقدرت اكتب
    ،،،،،،،،،،،،،،،،،،،،،،لقيت اصعب مواضيع الهوي كلمات فـي حقـك


    لاحظ ان الشطر الاول مو موزون حاول اتغنيها

    حاول اتغنيها بنفس لحن تناسيني لمحمد عبده
    تناسيني بنفس الموعد اللي به ذكرتيني .............
    ماراح تغنيها بسهوله
    حاول تصلحها

    ابي اكتب قصيدة حب ياكويت وعجزت اكتب
    ،،،،،،،،،،،،،،،،،،لقيت اصعب مواضيع الهوي كلمات في حقك

    حاول تغنيها وراح تمشي معاك ميه بالميه

    او ممكن اقول :

    احبك ياكويت العز ياتاج الفخر والطيـب
    ،،،،،،،،،،،،،،،،احبك وارخص الغالي وابيع الروح لترابك


    وعلي هالمنوال كمل

    ولاحظ انك في البدايه ما اخترت قافيه
    لكن هالقافيه راح تلتزم فيها بالابيات اللي راح تكتبها بعدين

    ملخص الكلام
    اختار الفكره واكتبها بطريقتك باي شكل كان
    وكمل القصيده كامله مع الالتزام بالقافيه
    وفي الاخر حاول توزنها مثل ماوضحت في البدايه
    بس

    ما ادري اذا كان كلامي مفيد او لا
    لاكنه محاوله مني ارجو انها تكون مفيده
    واي شي انا بالخدمه
    تحياتي


    وللموضوع بقايا


    ;dt j;jf rwd]i avp lfs' lk 7 H[.hx gpshx


  2. #2
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء الثاني:

    ضوابط مهمة للكتاب



    تعمدت ايكون عنوان الموضوع بهالصوره
    لانه امتداد للي قبله


    الموضوع هذا ماراح يفيدك
    الا لما تكون طبقت الكلام اللي بالموضوع اللي قبله


    واذا انت ماقريت الموضوع الاول اللي بخصوص
    (كيف تكتب شعر )
    ف ماراح يفيدك هالموضوع وراح اتضيع وقتك


    الزبده :

    بالموضوع الاول تعلمنا شلون نكتب شعر !؟!؟!
    طبعا ماكو شي بدون ممارسه
    ولا تتوقع انك قريت معلومه خلاص صرت تعرف لا
    اسال نفسك لما تعلمت القراءه والكتابه
    كم اخذت من وقت وممارسه علي ماعرفت تقرا وتكتب عدل
    ( انا عن نفسي اكثر من سنه )
    واسال نفسك وانت قاعد تكتب علي الكمبيوتر هالسوال
    ( هل انا اكتب الحين بالكمبيوتر بنفس صعوبة وسرعة اول مره ؟؟!؟!)

    ما اعتقد

    لان كل شي مع الممارسه يكون اسهل ( حتي كتابة الشعر )


    نرجع للموضوع

    انا راح افترض انك قريت وطبقت اللي بالمضوع الاول

    والنتيجه هنيه اهي انك الحين تقدر تكتب كلام موزون ومقفي

    (هذا طبعا مع الممارسه والتطبيق ) !!

    لكن

    هل الكلام الموزون والمقفى شعر ؟؟!؟!؟!؟!


    طبعا لا


    مثال علي هالشي
    وهي سالفه معروفه عن واحد وفروا له كل الظروف انه ايصير شاعر
    وقعدوه بمكان حلو ماء وخضره ووجه حسن وقالوله قول شعر
    شوفو شنو قال


    وكاننا والماء من حولنا
    ،،،،،،،،،،،،،،،،،، قوم جلوس حولهم ماء

    ؟؟؟؟

    بالله هذا كلام ؟؟؟


    اللي ابي اقوله ان مو كل كلام موزون مقفي شعر
    لان الشعر مشاعر تترجم بصور جماليه واضحه
    وانتبه لكلمة واضحه اهنيه
    ولحد ايقولي لا المعنا في بطن الشاعر
    لا هالمقوله كانلها مناسبتها وغير صحيحه

    المهم

    انت تعرف تكتب كلام موزون ومقفي
    ( وهذا شي خلصنا منه )

    وينقصك اهنيه انك اتعبر عن مشاعرك
    واللي يدور براسك وببساطه
    وراح ايكون هالكلام الموزون المقفي المعبر المفهوم الواضح

    شعر

    بس ؟!؟!؟!؟!

    لا مو بس

    في امور ثانيه

    ( وهذا اللي خلاني اكتب الموضوع )امور ثانيه لازم الكاتب يحاول يلتزم فيها
    وانا اقول ايحاول
    مو غصب


    اتبع الاتي :

    1- ابتعد عن الكلام اللي يمس الدين و والمقدسات

    2- استخدم كلام مفهوم ( يعني مو تدور كلام قديم مو مفهوم وتكتبه)

    3- استخدم معجمك الخاص ( راح اشرحها لكم )

    4- عبر عن نفسك وبس ( لاتفكر براي الاخرين )

    5- لاتناقظ نفسك وواقعك بصوره غلط ( هم راح اشرحها )

    6- لاتكرر القافيه

    7- لاتكرر الالفاض اكثر من اللازم

    8- اكتب وانسا واي فكره تطري علي بالك سجلها ولو بكلام عادي
    ( هذا اذا مو مستعجل ) .



    نقاط شكثر علي الفاضي صح ؟!

    ( لا موصح )


    نبدا من الاول مع الشرح :

    1- ابتعد عن الكلام اللي يمس الدين و والمقدسات
    واعتقد هذي الوحيده اللي ماتحتاج للشرح


    2- استخدم كلام مفهوم ( يعني مو تدور كلام قديم مو مفهوم وتكتبه)
    يا اخي الشعراء القديمين كانوا يستخدمون الكلام الدارج بحياتهم اليوميه
    وهذا اللي خلاهم يتميزون
    ( ماراح ازيد كلام اهنيه لان يمكن اطب )


    3- استخدم معجمك الخاص ( راح اشرحها لكم )
    لما تكتب استخدم الكلام اللي انت اتكلم فيه لا تتعمد تستخدم لهجه مو لهجتك
    ولا كلام مو من بيئتك مثال علي هالكلام

    تخيل شاعر
    او خل نقول تخيل شاعره مثقفه
    وتعليمها عالي وحضريه وفري قالت هالبيت :

    كل الاماني غاديه في يميني
    ،،،،،،،،،،،،،،،مير الظروف القاسيه ضيعتها

    علي طول راح تتساءل (ويمكن تشك)
    وتقول من وين كلمه مثل غاديه وكلمة مير ؟؟؟؟!!!!!


    يعني شفيها لو انها قالت

    كل الاماني صايره في يميني
    ،،،،،،،،،،،،،،، بس الظروف القاسيه ضيعتها


    يعني استخدم وابحث في معجمك الخاص وكلامك اليومي العادي
    لا ترد لكلمات غريبه عليك

    4- عبر عن نفسك وبس ( لاتفكر براي الاخرين )
    لما تكتب عبر عن نفسك
    وتاكد اذا كنت عفوي وصادق بتعبيرك انه كلامك بيكون احلي
    ولكن اذا كنت تبي يقال عنك الشاعر الفلاني
    فاقترح انك تترك الكتابه

    5- لاتناقظ نفسك وواقعك بصوره غلط ( هم راح اشرحها )

    هذي بابداها بمثال واهو

    تخيل مثلا ان هالابيات قالها شاعر مليونير او أمير ؟؟؟!!!!!!


    شف حالتي فقران والحال دوني
    ،،،،،،،،،،،،،،، والجسم من زود الفقر زاد سقمه
    اقعد مع السكه وانادي عطوني
    ،،،،،،،،،،،،،،،،،،،، من مال ربي يالاجاويد لقمه


    (راح تطق علي راسك وتقول الله يالكذب )

    ولحد يقولي المعنا كيت وكيت انا لي الظاهر

    وهذا اللي يفترض وانت تكتب تتبعه
    يعني
    بعد الكتابه الاوليه للقصيده
    فكر بمعنا الكلام وتفسيره وبعدين اعتمده

    6- لاتكرر القافيه
    وهذي واضحه يعني لو عندي بيت شعر مثلا

    اقعد مع السكه وانادي عطوني
    ،،،،،،،،،،،،،،،،،،،، من مال ربي يالاجاويد لقمه

    مايصير نفس القافيه بالابيات الثانيه ( عطوني ) او ( لقمه ) !

    وان حدث فيكون ضعف

    او لاغراض متعمده ومقصوده بس



    7- لاتكرر الالفاض اكثر من اللازم
    لان تكرار اللفض الواحد بكثره يبعث الملل وكانك مو لاقي الا هالكلمه تعيد وتزيد فيها
    يعني مره قول احبك ومره اهواك ومره متيم ومره اشتاقلك
    كلها تعبر بطريقه او باخري عن الحب ولكن اللفظ اختلف

    8- اكتب وانسا واي فكره تطري علي بالك سجلها ولو بكلام عادي
    ( هذا اذا مو مستعجل ) .
    وهذا من واقع تجربه سو اللي اقولك علي مسؤوليتي


    هذا اللي ابي اقوله للحين
    وللحديث بقيه

  3. #3
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء الثالث

    خطوات عمليه لكتابه الشعر
    تنويه في البدايه انه هالموضوع رقم ثلاثه

    يعني لاتطمر وتقرا هالموضوع وانت ماقريت الموضوعين اللي قبله

    لان هالموضوع بروحه ماراح يكون مفيد ولاله اي قيمه

    ــــــــــــــــــــ

    الموضوع : ( وراح اختصر قد ما اقدر )


    في الموضوعين اللي قبل عرفنا شلون نكتب شعر
    ( هذا المفروض يكون )


    !!!!!

    بس كل اللي فات كلام نظري

    يعني نظريا صح

    يفترض بان اللي طبق الكلام في الموضوع الاول والثاني
    خلاص صار يكتب شعر

    بس هالكلام لازال نظري !!؟؟!

    انا ابي فعليا لما امسك قلم واكون ناوي اكتب شعر
    هل راح اقدر اكتب شعر ؟!؟!؟!؟!؟




    نعم تقدر




    وهذا هو موضوعنا هالمره


    واهو خطوات عمليه لكتابة الشعر ( وانا بطبيعة الحال افترض انك خلاص استوعبت اللي بالموضوعين اللي قبل )

    خلنا اول شي نتفق علي هالامر واللي اهو

    ان القصيده قسمين


    1-الفكره (خمسين بالميه )

    2- الصياغه والوزن والقافيه و .......الخ ( خمسين بالميه )

    !!!!

    هذا اللي انا شايفه


    مسألة الفكره ما اقدر اسوي فيها شي
    هذي ترجع لك انت
    وترجع لحياتك وترجع للموضوع اللي تبيه
    (وراح اتكلم عنها بموضوع مستقل انشاء الله)


    ولكن الامور الثانيه ممكن نتعامل وياها

    ــــــــــــــــــــــــــــــــــــــــــــــــــ ـــــــــــــــــ

    الكتابه العمليه للشعر

    وهالموضوع راح نقسمه لمرحلتين


    1- الاستعداد والتدريب

    2- مباشرة الكتابه
    ـــــــــــــــــ

    المرحله الاولي:

    1- الاستعداد والتدريب

    لما تبي تلقي محاضره او درس عن القدس مثلا
    لازم تقرا تاريخ القدس
    وتقرا السياسه وتجهز امورك ..... صح ؟!!!؟؟!


    قبل لانكتب



    ياليت اتحاول قد ماتقدر تسوي هالامور :

    1 - اقرا شعر فصيح ( اول شي لاحمد شوقي والشعراء اللي عاصروه وبعدين اقرا المعلقات حتا لو مافهمتها )


    2 - اقرا واسمع لهالشعراء (خلف العتيبي - سليمان الهويدي - خالد الفيصل - محمدبن راشد المكتوم - سعود بن بندر - عبدالله الفيصل - مرشد البذال - طلال السعيد )
    بس هذولا وانا مختارهم بالذات متعمد مو معناتها مافيه غيرهم لا فيه
    و يمكن افضل بس ابيك تسمع كلامي
    واعتمد


    وارجووووك
    اترك شعراء هاليومين لانهم راح يخربون مستواك
    ( شعراء هاليومين ذبحونا بهالكلام
    نعنبوها ونعنبو جدها ويلعن خيرها والله ياخذ خالتها....
    مادري أي غزل كله شتايم
    شوي ويقولون يابنت ...... المهم )





    3- درب نفسك علي كتابة الشعر !!

    شلون ؟!
    انا اعطيك هالطريقه وحاول تسويها

    اختار اي بيت شعر وحاول تكتب علي نفس منواله

    وعلشان تسهل الامر علي نفسك
    اكتب الكلمات اللي تخدم قافيتك براس الصفحه عشان تكون حاضره قدامك


    مثال :
    والبيت لسعود بن بندر الله يرحمه





    ياليتني بينـك وبيـن المضـره
    من غزة الشوكه الي سكرة الموت





    براس الصفحه اكتب الكلمات اللي تساعدك

    مضره : مسره - مبره - جره - مره - مجره .......الخ

    موت : فوت - صوت - حوت - قوت - مكبوت - .........الخ


    واقعد ركب





    ناديتلـك ياغايتـي الـف مــره
    وان فات فينا الفوت ماينفع الصوت

    ماشفت ياعمري بعمـري مسـره
    والضيم فيني طول الازمان مكبوت


    وهلم جره



    تحدى نفسك بالكتابه وحاول تكتب 4 او 5 ابيات نفسه
    واذا خلصت اختار بيت غيره واكتب علي شاكلته
    ( وكرر هالعمليه لان الممارسه مهمه)


    ـــــــــــــــــــــــــــــ

    المرحله الثانيه :



    قول باسم الله


    قبل لاتبدأ


    - تاكد انك اذا لقيت الفكره ف خمسين بالميه من القصيده خلص

    - حط في بالك ان الكتابه امرها سهل مو شي معقد

    - اعتقد وامن بانك تقدر تكتب شعر

    - تأكد ان المساله مو الهام او وحي ينزل عليك

    كل المساله حاله من الاستعداد الذهني والنفسي والعاطفي
    فهيئ الجو المناسب للكتابه بعدين راح تلقا الامر عادي
    يعني جو الهدوء والمكان الحلو والبراد ...

    وصدقني مساله الجو المناسب بعدين تصير مالها داعي
    يعني انا
    ما اكتب الا وعندي ناس مزعجين يسولفون
    او وانا اطالع مباراة كره قدم


    المهم


    صل علي النبي



    2- مباشرة الكتابه

    أ - الكتابه الاوليه
    ب - تعديل المعاني
    ج - ضبط القافيه
    د - ضبط الوزن
    ه -اعتماد القصيده


    وراح نتكلم عن كل نقطه بروح :


    أ - الكتابه الاوليه
    (اكتب بالفكره اللي تبيها و لاتعقد الامور
    ولا تركز حيل علي المعاني لكن حاول تكتب اللي في بالك
    وحاول تسترسل قد ماتقدر
    وكثر ماتستبسط الامر راح تلقاه بسيط )

    (قول بسيطه ماتستبسطهاش) ===>> مالها شغل بالموضوع



    ب - تعديل المعاني
    ( يعني مثلا لاتذكر المؤنث او تأنث المذكر ولاتجمع المفرد او تثني الجمع
    وانتبه للمعني اللي انت كتبته مو المعني اللي في بالك )


    ج - ضبط القافيه( والقافيه تكون من حرفين او ثلاثه في الغالب
    وانتبه للتشكيل
    مثلا كلمه يختلف بكسر اللام وكلمة اختلف بفتح اللام !!
    صحيح ان اخر ثلاث حروف نفس الشي بس التشكيل للحرف اللي قبل الاخير عفس الدنيا وخلاهم مايضبطون .
    و ممكن تتبع الطريقه اللي قبل شوي
    انك تكتب الكلمات اللي تساعدك براس الصفحه وتستخدم هالكلمات )

    د - ظبط الوزن( مسالة ظبط الوزن راح تكتسبها مع الممارسه
    لكن الحين حاول تغنيها بنفس اللحن راح تجي معاك
    و بالموضوع الاول سولفنا عنها وراح انتوسع فيه مستقبلا اذا الله اراد )


    ه -اعتماد القصيده( اذا كتبت قصيده واعجبتك اكتبها وانساها علي الاقل اسبوع وبعد الاسبوع اقراها
    طبق هالمسأله ولا راح تندم صدقني )




    ــــــــــــــــــــــــــــــــــــ

    وانت تكتب

    - حاول تبتعد عن القوافي الصعبه لانها راح تاذيك


    - ولاتستعجل مسالة اتقان الوزن كل شي بالممارسه



    بعد ماتكتب

    - ابحث عن اخطاءك وانقد نفسك بنفسك

    - قارن أي قصيده تكتبها بقصيده مشابهه لها


    - اعرض محاولاتك علي ناس تثق انهم ينصحونك ولاتزعل من النقد
    ومو بالضروره ان اللي ينقدك شاعر يكفي أي متذوق للشعر انه ينقدك
    اهم شي يكون صادق

    (وللعلم النقد فيه بناء وفيه غير بناء
    البناء هو اللي يقولك عندك خطا كذا وكذا ويبين شنو الخطا ووين صايراذا قدر
    والغير بناء اهو اللي يقولك انت عندك اخطاء
    ولايقول شنو او يقول لا فيها نواقص ولا يبين او يقول شنو هالنواقص )


    شوف




    القصيده اساسها الفكره

    فاذا الفكره اخذت 4 ابيات في التعبير عنها

    ف هالاربعه كفايه مو بالظروره اتمطط الفكره عشان اتصير طويله


    عط كل شي قدره

    ياما ابيات مفرده وبروحها تسوالها قصايد من مية بيت



    ومسالة الفكره يبيلها موضوع كامل بروح

    (انشاء الله )



    ـــــــــــــــــــــــــــــــــــــــــــــــــ


    سامحوني علي التقصير وعلي تشعب الموضوع

    واذا فيه اي شي مو واضح اتمني احد يقولي



    انا حاضر لاي تساؤل او سوال او اقتراح ممكن افيد او استفيد منه

    ( بالنهايه هذا اجتهاد يحتمل الصواب ويحتمل الخطأ )


    وللموضوع بقيه

  4. #4
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء الرابع

    الفكرة والقصيدة



    هالموضوع ماكان الا لاني وعدت بكتابته
    ولو ان امور كثيره مو عاجبتني !!
    وانشاء الله اني سأفي بوعدي خلاله
    والتأخيركان لأني ماتنبهت للوعد الا متاخرا (وهذا خطئي واعتذر عنه)
    اما بخصوص الوزن , والقافيه والمفرده فربما ساكتب عنها وهذا ليس بوعد
    (ولو ان الوزن امره هين بس المشكله بالمفرده وامتدادها ...)

    ليش طولتها ؟!؟!؟


    الموضوع :



    4

    الفكره والقصيده

    الموضوع هذا ماهو إلا اضاءه لتوضيح الفكره بالأساس ومن باب المعرفه بالشئ
    ومن باب قناعتي ان اي امر لما اعرف اجزاءه ، وشلون مركب وطريقة تكوينه راح يكون التعامل معاه اسهل وابسط .

    الكثيرين يعتقدون إن الفكره مجرد موضوع للقصيدة وبس !!؟

    لكن اقول
    ان الفكره هي المخطط العام للقصيده اللي يبين الغايه والهدف منها ويوضح تسلسلها وطريقة بنائها

    واذا انت حددت هالامور ,

    مو المفروض انك تسوي مخطط يبين تصورك النهائي !؟!!!


    انا ما احب اتفلسف او ادخل في متاهات مالها داعي
    ولكن الموضوع هذا بالذات مجرد مافكرت فيه لقيت افكاري تشعبت وتنوعت بشكل خلاني اتردد اني اكتبه بالاساس ناهيك عن اني استفيض فيه

    فلذلك وعلشان نصيب الهدف من هالموضوع ومن غير لانضيع
    فراح نتناول هالموضوع كالتالي وبالظبط بهالترتيب :


    1- مفهوم الفكره
    2- أقسام الفكره
    3- عرض أمثله
    4- صياغة قصيده من الصفر



    ــــــــــ خلك معاي





    1 – مفهوم الفكره:


    قلنا في الموضوع اللي قبل هذا إن الفكرة تمثل خمسين بالميه من القصيدة<<<< قناعه كاملة


    أول شي لازم تعرف ان الفكرة هي أساس للقصيدة

    { وأساس الفكرة هو أنت }

    سواء تبي تقول شي, توصف شي, أو تعبر عن أي شي

    - لا تتوقع إني أعطيك فكره جاهزة وأقولك تفضل اكتب !! ما اقدر

    - كل اللي اقدر عليه إني أعطي شرح عام وخطه للتفكير عشان تعرف أنت وين تمشي وشنو قاعد تسوي بس



    شنو أو ماهي الفكرة ؟؟ (حلوه ماهي )

    الفكرة هي المادة أو الإحساس اوالتصور الواضح اللي تبي تكتبه

    وخل ننتبه لهالشي ان الفكره مو معناتها إني أبي اكتب غزل، مدح ، هجاء، وصف، فخر.........الخ

    ((يعني مجرد إني بكتب قصيده غزل مو فكره )) !!


    إنما الفكره مثل ماقلنا هي:

    المادة أو الإحساس اوالتصور الواضح اللي تبي تكتبه

    واهم شي ((( الواضح )))

    ـــــــــــــــــــــــــــــــــــــ


    2- اقسام الفكره

    راح نقسم الفكره إلى 3 أقسام:

    1- فكره أساسيه
    2- فكره فرعيه
    3- فكرة صياغه


    1- الفكره الاساسيه:
    وهي الخط الرئيسي للقصيده او مجموعة ابيات فيها واهي مثلا اني بارسل رسالة عتب لصديق
    او ابي اعبر عن إحساس معين بخاطري او موضوع ابي اكتبه خلال قصيده ؟!؟!

    2- فكره فرعيه:
    واهي فكره البيت بحد ذاته او الصوره الشعريه الخاصه فيه
    اوالخاصه بمجموعة أبيات شعرية واللي تخدم المعني العام
    و احيانا
    واقول احيانا ممكن تنفهم بمعني ثاني لو قرأت البيت بدون باقي القصيدة
    يعني مثلا قصيده مدح لشخص معين .......
    ومن ضمن الأبيات شبهته بنور الشمس ! (هذي فكره فرعيه )

    3- فكرة صياغه:
    وهي الحبكة في القصيدة او طريقة العرض والسرد (وغالبا الابداع يكون اهنيه)



    كلام مو مفهوم صح ؟!!


    (( إذا ما استوعبت هالنقاط لا تنزعج راح نشرحها بالامثله وراح تستوعبها عدل ))



    تراهن ؟؟؟!!!

    ـــــــــــــــــــــــــ


    3- عرض أمثله

    خلال الامثله اللي راح نذكرها راح تبين اقسام الفكره وطريقتها انشاء الله

    المثال الاول:

    ابيك تقرا هالقصيده بشكل سريع
    وبعدين راح انعلق عليها

    عن مستواي اليوم تسأل شالاسباب
    ..................... والاسئله في محتواها تشابه
    دكتور تسأل والسبب عين واهداب
    .................. يوم امتحاني كنت احاتي غيابه
    يوم امتحاني عشت في حلم كذاب
    ............. صرت اكتب اشعاري مكان الاجابه
    وشلون تعبير الألم فيه جذاب
    ................ منية حياتي شوف حضرة جنابه
    في ضحكته يعزف علي عود زرياب
    ................... يرفع بضحكِه كل معنى الكآبه
    لو عذربوني مايهم التعذراب
    ....................... الواقع اني عاشقن للذرابه
    دكتور تسألني !! أنا مسكر الباب
    .................... حتى لدروسي ما ألقَّي مجابه

    في هالمثال

    الفكره الاساسيه : غزل بطريقة اجابه علي سؤال دكتور بخصوص المستوى الدراسي

    فكره فرعيه :
    تشبيه الضحك بعزف العود (في ضحكته يعزف علي عود زرياب) <<<< ويمكن تكون هناك افكار فرعيه اخري

    فكرة الصياغه : الجواب عن تدني مستوى الامتحان خلال التعذر بوجود محبوبه غائبه وصولا إلي عدم التفكير بالدروس اصلا

    ــــــــــــــــــــــــــــــــــ

    مثال ثاني وراح نشرحه اكثر
    اقرا هالقصيده شوي شوي
    وبعدين اقرا الشرح :

    لو كان لو الورود اسـود
    ...................والشمس بالليل مألوفـه
    والثور فوق الشجر غـرد
    ...............والفيل يزحف علي الطوفه
    أو الفقع بالبحـر يوجـد
    ................أو طارت أسراب منتوفـه
    والصين كانوا عدد مفـرد
    .................والثلج في صيفنا انشوفه
    او عمر الانسـان يتجـدد
    ..................او السما بخيـط ملفوفـه
    وابليـس للخيـر يتعمـد
    ................ والجن بالطيب معروفـه
    او بوش يرتاح لاسم احمد
    ................ او اليهودي نسـى خوفـه
    لايمكن العـرب تتوحـد
    ................ وان صار ماقيل بحروفـه


    لو حاولنا نشرح هالقصيده
    راح نلقا وبكل بساطه ان الشاعر يبي يقول ان اتحاد العرب مستحيل
    وعلشان يقول هالشئ فاختار انه يعرض ويقول عدد من المستحيلات ويوصل بالنتيجه ان حتا ولو حدثت هذي المستحيلات فاتحاد العرب مستحيل
    والخلاصه
    ان اتحاد العرب مستحيل <<<<<<<<< فكره اساسيه
    كل مستحيل ذكره الشاعر <<<<<<<<< قكره فرعيه
    عرض المستحيلات والوصول الي النتيجه بالنهايه <<<<<<<<< فكرة صياغه

    وبشكل ثاني:
    حسب التقسيمات اللي اتفقنا عليها فيمكن نقول ان

    الفكره الاساسيه هي :اتحاد العرب مستحيل

    الفكره الفرعيه: في هالقصيده 14 فكره فرعيه
    (ولاحظ ان كل نقطه فيها صوره مختلفه)
    وهي بالترتيب :
    1-لو كان لون الورود اسـود
    2- لو الشمس بالليل مألوفـه
    3- لو الثور فوق الشجر غـرد
    4- لو كان الفيل يزحف علي الطوفه
    5- لو كان الفقع بالبحـر يوجـد
    6- لو طارت أسراب منتوفـه
    7- الصين كانوا عدد مفـرد
    8- الثلج في صيفنا انشوفه
    9- عمر الانسـان يتجـدد
    10- السما بخيـط ملفوفـه
    11- ابليـس للخيـر يتعمـد
    12- الجن بالطيب معروفـه
    13- بوش يرتاح لاسم احمد
    14- اليهودي نسـى خوفـه

    فكرة الصياغه : وهي طريقه الشاعر في انه عرض المستحيلات ووصل للنتيجه اللي يبيها
    فالشاعر اهنيه بدا في
    لو كان .....
    وبعدين ؟!؟!!
    الشمس بالليل مالوفه-الثور فوق الشجر .........الخ

    واخر شي انتهت في :
    لايمكن العرب تتوحد ..............

    راح اكتفي بهالمثالين عشان مايطول الموضوع
    ولو ان في بالي امثله ثانيه فيها فكره اساسيه وحده ولافيها أي فكره فرعيه وفكرة صياغتها هي نفسها الفكره الاساسيه
    يعني مثلا سرد قصه بطريقة قصيده
    ( نفس قصيده امير الشعراء احمد شوقي اللي في بدايتها يقول برز الثعلب يوما في شعار الواعظينا ......)
    ومثال ثاني مليان افكار فرعيه وفكرة الصياغه فيه رائعه
    (في قصيدة ايليا ابوماضي اللي اولها – قال السماء كئيبة وتجهما- )


    عموما اذا ماكو فايده من هالكلام فانشاء الله راح تلقا بالنقطه الجايه فايده

    ـــــــــــــــــــــــــــــــــــــــــــــــ


    5- صياغة قصيده من الصفر :


    مثل ماقلنا قبل
    اكتب موضوعك بتعبيرك العادي وبعدين رتبه :

    الخطوه الاولي :
    اكتب الموضوع اللي راح تصيغه بطريقتك وحاول تسترسل وتكتب قد ماتقدر

    الموضوع مثلا :

    ((( القصيده تتكون من ابيات شعريه والبيت الشعري يتكون من شطرين صدر البيت وعجز البيت ولازم يكون للبيت قافيه نلتزم فيها تتكون من حرفين في الغالب وطبعا لازم كل بيت يكون موزون حسب البحر اللي ماشيه عليه باقي القصيده ولازم نختار الالفاظ اللي تساعدنا في التعبير المناسب والدقيق قدر الامكان عن الفكره اللي نبيها لان الفكره بالنهايه هي محور القصيده وموضوعها وبطبيعة الحال يختلف الشعراء في تناولهم وصياغتهم ونظرتهم للافكار ويكون تميزهم في طريقة التصور الكامل لهالافكار )))


    الخطوه الثانيه :
    حاول تجزئ افكارك يعني تحطهم بطريقة نقاط بهالشكل:

    - القصيده تتكون من ابيات شعريه
    - البيت الشعري يتكون من شطرين صدر البيت وعجز البيت
    - البيت لازم يكون له قافيه نلتزم فيها
    - القافيه تتكون من حرفين في الغالب
    - لازم يكون موزون حسب البحر اللي ماشيه عليه باقي القصيده
    - ولازم نختار الالفاظ اللي تساعدنا في التعبير المناسب والدقيق قدر الامكان
    - الفكره هي محور القصيده
    - يختلف الشعراء في تناولهم وصياغتهم ونظرتهم للافكار
    - ويكون تميزهم في طريقة التصور الكامل لهالافكار

    الخطوه الثالثه
    حاول تفهم هالنقاط وتستوعبهم عدل وحاول تضيفلهم
    وابدا ببيت منهم اذا قدرت واذا ماقدرت لو شطر بيت ومو بالظروره بنفس الوقت
    واسال نفسك اذا كتبت شطر بيت او بيت هل ممكن اصيغه بشكل احسن او لا ؟!؟!
    بعد ماتكتب البيت الاول اللي مقتنع فيه
    خلاص الجزء الصعب انتهى
    (لان القافيه تحددت ولان البحر (الوزن) اللي راح تمشي عليه صار موجود)
    حاول تكمل باقي الابيات علي نفس منواله ونفس قافيته ولحنه
    ومو شرط يكون ترتيب ابياتك بنفس الترتيب اللي حطيته بنقاط ((اللي بالخطوه الثانيه))
    لكن استخدم النقطه المناسبه واللي تشوف انها ماشيه حسب حاجتك

    الخطوه الاخيره
    اكتب القصيده وحاول تراجع معانيها
    وبعدين حاول تشيلها (تغنيها) بلحن ثابت
    واذا مشت بهاللحن حاول تغير اللحن كذا مره
    واذا لقيت انها ماشيه بسلاسه بالاغنيه فهي تماااام (بس مو تعوج لسانك تمشيها غصب)


    النتيجه النهائيه اللي طلعت معاي لقصيدتنا :


    البيت له صدرن وعجز وينتهي في قافيه
    .....................يحكم بوزن ايكون واجب نلتزم في وزنته
    الصدر فيه اول شطر والعجز شطره ثانيه
    ........................ والقافيه حرفين او اكثر باخر شطرته
    والوزن له رنة جرس لابد تطلع صافيه
    ........................... لابد ينساب الكلام ابنزلته او رفعته
    ولانسيت المفرده ماظن هذي خافيه
    ................... من صاغ بيت ايدور اللفظ الحسن في لفظته
    واهم من هذا وذاك افكار تكتب وافيه
    ...................... روح القصايد فكرها ولكل شاعر نظرته
    احلي القصايد ماتميز في معاني كافيه
    ...................... والبيت صوره مبدعه في فن ترسم حبكته

    ((مشكلتي انا طلعت معاي موزونه من البدايه
    وصدقني هالامر بالممارسه (واللي يقولك علم العروض والتفعيله قوله استرييييييييح) ولاشي غير الممارسه ))


    ولاتظن هالنتيجه راح تطلع معاك من اول او ثاني او سابع محاوله ..

    ولاتظن انك بعد فتره من الممارسه راح تكون مظطر اتسوي هالخطوات كلها ..

    بالعكس راح تلقا نفسك مباشره رايح للخطوه الاخيره

    ((وكل شي مع الممارسه يصير))

  5. #5
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء الخامس

    ماهي القافيه




    خلال المواضيع اللي فاتت والموضوع هذى والمواضيع الجايه لازم نعرف اننا نتكلم عن شي محدد

    وهو الشعر الشعبي الموزون المقفى

    يعني مو قاعدين نتكلم عن الشعر الحر ولا شعر التفعيله ولا النثر ولا الخواطر
    ولاقاعدين نتكلم عن الشعر الفصيح ولو ان الشعر الفصيح يتفق مع كلامنا

    أقول مره ثانيه نحن نتكلم عن الشعر الشعبي الموزون المقفى واللي يسمى مجازا الشعر النبطي


    وموضوعنا هالمره عن القافيه

    وراح انقسم الموضوع كالآتي

    1 - مفهوم القافيه وأمثله عليها
    2 - أشكال القصيده من حيث القافيه
    3 - مواطن الضعف والقوه في القافيه

    ـــــــــــــــــــــ

    1 - مفهوم القافيه وأمثله عليها

    قلنا في مواضيعنا السابقه ان القافيه هي حرفين او أكثر بآخر شطر كل بيت
    ( والكلام هذا غير دقيق وراح نشوف في هالموضوع ليش غير دقيق )

    مفهوم القافيه
    هو أن المقاطع الأخيره للأبيات الشعريه تأتي متفقه من حيث الشكل والحرف
    من حيث الشكل في آخر حرفين أو أكثر
    ومن حيث الأحرف على الأقل حرف واحد
    وللتوضيح الشكل هو الفتحه أو الضمه أو السكون


    أمثله على القافيه:
    ملاحظه
    (((خلال الامثله القادمه لن أضع قصائد كامله بل أجزاء من قصائد لكي لا اطيل عليكم)))

    مثال :

    يا صاحبي هـذا زمـان الـهــوانـم
    ،،،،،،،،،،،،،،،،،،،،،،،،،،،،واهل المراجل حالهم في تردي
    مـا للـرجوله من يسـوم او يسـاوم
    ،،،،،،،،،،،،،،،،،،،،،،،،،،صار الترف عنوان لاهل التحدي
    ضعنا وميزان الحيا صار عايم
    ،،،،،،،،،،،،،،،،،،،،،،،،،،،،،،والحق فينا بين جذبن وشدي

    قافية الأشطر الأولى من حرف واحد
    هوانم - يساوم - عايم
    قافية الشطرات الثانيه من حرفين
    تردي - تحدي - شدي

    ولاحظ القافية في هالأبيات:


    ياحظ كرتي صار بايديك محروق
    ،،،،،،،،،،،،،،،،،،،،،،،،،،،،ماعادلي وياك غايات واطماع
    عندي قناعه يضحك الوقت ويروق
    ،،،،،،،،،،،،،،،،،،،،،،،،،،وتصير تاريخ احتوا هم واوجاع
    انا الأمل وياي عاشق ومعشوق
    ،،،،،،،،،،،،،،،،،،،،،،،،،،والحلم باقي ماوصل حد الاشباع

    قافية الأشطر الأولى من حرفين
    محروق - يروق - معشوق
    وأيضا قافية الشطرات الثانيه من حرفين
    أطماع - أوجاع - إشباع

    وآخر مثال:


    كثر مامرني طيفك تعبت أسأل عن أحوالك
    ،،،،،،،،،،،،،،،،،،،،،،،،،،ولا صارت ولو مره عن أحوالي سألتيني
    أنا العاشق لهجرانك ومهما كانت أفعالك
    ،،،،،،،،،،،،،،،،،،،،،،،،،،،وعاشق بعدك وصدك واحبك لو تجافيني
    وأحبك لوتكبرتي أو ابديتيلي اهمالك
    ،،،،،،،،،،،،،،،،،،،،،،،،،،،،ولا تفرق معاي انك نسيتي أو تناسيني

    لاحض قافية الأشطر الأولى من ثلاث حروف
    أحوالك - افعالك - اهمالك
    قافية الأشطر الثانيه من ثلاث حروف أيضا
    سألتيني - تجافيني - تناسيني


    شفنا في هالأمثله قافيه من حرف ومن وحرفين ومن وثلاث أحرف

    وأكيد لاحظت ان الظابط الأساسي في القافيه لكي تكون سليمه هو المقطع الأخير من المفردات الأخيره
    يعني مو بس الحرف الأخير
    ويعني ان ممكن يكون هناك تشابه في اخر حرف او حرفين لكن القافيه خطأ


    مثال على هالأمر

    1 -

    دمدم الانكار في وجه العبير الزعفراني
    ،،،،،،،،،،،،،،،،،،،،،،،،،والخمايل تستظل الشمس في غصن اشجره
    في حكايات الف ليله تنكتب ليله عشاني
    ،،،،،،،،،،،،،،،،،،،،،،،،،،،،،وارجع اكتب الف ليله عن مشاعر نيره
    يافرح وقف عرفت اللي تبيه وماخفاني
    ،،،،،،،،،،،،،،،،،،،،،،،،،،،،،،جيت تطلبني دموعي والدموع محيره

    2 -

    يانور الليل ماهو ليل اذا كنتي وهج للشمس
    ،،،،،،،،،،،،،،،،،،،،،،،،،،يكون الليل بروازك وكوني روعة الصـوره
    تجلّي للشعر الهام مسحور بعبيـر وهمـس
    ،،،،،،،،،،،،،،،،،،،،،،،،،،،،وكوني للبشر قصه وبين النـاس اسطـوره
    رفعتي شان من حولك عطيتي للعذارى درس
    ،،،،،،،،،،،،،،،،،،،،،،،،،،،،،،فلا كنتـي ثقيلـة دم او بالزيـن مغـروره

    في الأبيات اللي ذكرناها

    قافية الشطر الثاني في المثال الاول >>>> ( شجره - نيّره - محيّره )
    قافية الشطر الثاني في المثال الثاني >>>> ( صـوره - اسطوره - مغروره )

    وأكيد لاحظت في المثالين انه ورغم ان القافيه تنتهي بحرفين متماثلين إلا ان القافيه تعتبر مختلفه


    ـــــــــــــــــــــــــــــــــــــــــــــــــ


    2 - أشكال القصيده من حيث القافيه

    الشي الأساسي اللي يميز كل شكل عن الشكل الآخر في الشعر هو طريقة القافيه فيه

    من حيث القافيه الشعر له أربع أشكال معروفه

    أ-الشكل الاول :
    وهو الشكل الطاغي حاليا على الساحه
    وهو أن جميع أبيات القصيده تتكون من شطرين مختلفين القافيه
    وتكون جميع الشطرات الاولي في جميع ابيات القصيده لها نفس القافيه
    وتكون جميع الشطرات الثانيه في جميع ابيات القصيده لها نفس القافيه

    مثال:


    (.......الشطر الأول .......)
    ،،،،،،،،،،،،،،،،،،،،،،،،،،،،،،،،،،(.......الشطر الثاني ......)
    كل عاشق له الله ينكوي بالـعـهـــود
    ،،،،،،،،،،،،،،،،،،،،،،،،،،،، للوعد والهوي يبقى مطيعن سميع
    يشرب السم هاقي فيه ماي الخـلـــود
    ،،،،،،،،،،،،،،،،،،،،،،،،،،،،، لو تلومه جميع الناس يبقي وديـع
    وان قصرت بكلامي او قطعت الحدود
    ،،،،،،،،،،،،،،،،،،،،،،،،،،،،،،، أعتذر بالقوافي لو فشلهـا ذريـع


    ب-الشكل الثاني :
    وهو شكل لازال موجود ولكن ليس كوجود الشكل الاول
    وهو أن جميع أبيات القصيده تتكون من شطرين
    ويكون شطرين البيت الاول لهما نفس القافيه
    أما الابيات الباقيه للقصيده
    فتكون الشطرات الاولى من الابيات غير ملتزم بقافيه ثابته وتكون حره لايحكمها سوى الوزن
    وتكون الشطرات الثانيه للأبيات ملتزم بقافيه البيت الاول

    مثال :

    (........الشطر الأول ........)
    ،،،،،،،،،،،،،،،،،،،،،،،،،،،،،،،،،،،،،،(.......الشط ر الثاني .......)
    يـا بقـايا حـلـم ضـايع له ثمـان سنيـن عنـي
    ،،،،،،،،،،،،،،،،،،،،،،،،،،،،، رجَّعـت ذكراه ليله كـان فيها ماغبنـي
    ماحسبت حساب يرجع حلمي الضايع وشوفه
    ،،،،،،،،،،،،،،،،،،،،،،،،،،لين ذكراه استجدت والحقيـقه خاب ظـنـي
    رد فـينـي مـا نسـيته او تنـاسـيـته وعـوَّد
    ،،،،،،،،،،،،،،،،،،،،،،،،وارتجف ليلي خواطر مع طيوف احلام جني

    ج-الشكل الثالث :
    وهو أقل الأشكال استخداما ويندر استخدامه حاليا
    وهو أن جميع أبيات القصيده تتكون من شطرين
    والقافيه تكون ملتزمه في الشطر الثاني فقط

    مثال:

    (......الشطر الأول ......)
    ،،،،،،،،،،،،،،،،،،،،،،،،،،،،(......الشطر الثاني .....)
    يادمع خلك في محاجرك وابتسم
    ،،،،،،،،،،،،،،،،،،،،،،،،،،،لا تلـتـفـت بالحـب لاوهـام زايـفـه
    أعـز دمعي واطلب العين عـزهـا
    ،،،،،،،،،،،،،،،،،،،،،،،،،،،وان كانت أشواقي من البعد خايفه
    واقــول كل الـهم لابـد منطــوي
    ،،،،،،،،،،،،،،،،،،،،،،،،،،،،والــروح للأفــراح لابــد شـايـفـه

    د - الشكل الرابع
    ويطلق عليه اسم المروبع لأن البيت يتكون من أربع شطرات
    الثلاث أشطر الأولي من كل بيت علي قافيه واحده ويختلف الشطر الاخير في قافيته
    الشطرات الثلاث الأولى في كل بيت تختلف عن البيت اللذي قبله واللذي يليه
    أما في باقي الأبيات تكون قافيه الشطر الأخير ((الرابع)) هي المستمره علي طول القصيده

    مثال :

    (.....الشطر الأول .....)
    (.....الشطر الثاني.....)
    (.....الشطر الثالث .....)
    ،،،،،،،،،،،،،،،،،،،،،،،،(.....الشطر الرابع .....)

    لاجل هالعينين تكرم الف عـين
    والأدب يفرض علي مثلي يلين
    شخص مثلك انت لماح وفطين
    ،،،،،،،،،،،،،،،،،،،،،،،،،،والحفل مرات يحتاج لعريف

    لانجي وندور في نفـس المكان
    الوضوح ايكون للعاقل ضمان
    الله العادل ومن يظـلم يهـان
    ،،،،،،،،،،،،،،،،،،،،،،،،،،والامل بالله والـمعنى شـريف

    مـاكذبت ومالبست الأقـنعـه
    لا ولا راوغت او كنت اممعه
    راي غيري لو يعارض اسمعه
    ،،،،،،،،،،،،،،،،،،،،،،،رب جاهل كان في رايه حصيف


    ـــــــــــــــــــــــــــــــ



    3 - مواطن الضعف والقوه في القافيه


    - مايجوز تكون القافيه بتكرار نفس الكلمات
    يعني اول بيت تكون القافيه مثلا (الناس ) والبيت الثاني (الناس ) والثالث (الناس ) إلي اخر القصيده (الناس ) هالشي غلط

    - مايجوز تكرار نفس الكلمه مالم يختلف معناها في القافيه اكثر من مره إلا عند الضروره القصوى وامتداد القصيده وان حدث التكرار فيكون ضعف

    - تكرار الكلمه في القافيه اذا اختلف معناها يكون من باب الابداع والفن
    مثلا هالبيتين وهما من قصيده واحده :


    يلتوي غيري وأنا بالدرب ماشيٍ لواني
    ،،،،،،،،،،،،،،،،،،،،،،،،،،،،،،لكن اسلك في مساري لاتصعَّب أيسَره
    لاتسائلني عن اللي كان واللي كان كاني
    ،،،،،،،،،،،،،،،،،،،،،،،،،،،،،،ولا تحاول تخلط الموضوع أيمن بايسَرَه

    لاحظ ( أيسره ) في نهاية البيتين وانتبه لمعناها

    ( أيسره )في البيت الاول أتت بمعني أسهل و أيسر
    ( أيسره )في البيت الثاني اتت بمعني عكس اليمين أي اليسار

    مثال ثاني :
    كان البيت الاول في بداية القصيده والبيت الثاني في اخرها


    كان مزحوم يومك بالمواعيد حافل
    ،،،،،،،،،،،،،،،،،،،،،،،،وان طلبتك دقيقه بيوم عنها اعتذرتي
    صرت هالحين ماني بالمواعيد حافل
    ،،،،،،،،،،،،،،،،،،،،،،،،،،،هاك مني دقيقه اليوم دامك طلبتي

    لاحظ ( حافل ) في نهاية الشطر الاول للبيتين وانتبه لمعناها

    ( حافل )في البيت الاول أتت اتت بمعني مزدحم بالمواعد وممتلئ
    ( حافل )في البيت الثاني اتت بمعني مهتم أي غير مهتم وغير حافل بالمواعيد

    ومن هالكلام فتجد نوع من الجماليه أضيفت للقصيده بواسطه تكرار كلمات متماثله بالحروف ومختلفه بالمعنى
    ومثل ماقلنا هذا يدل على فطنة الشاعر وذكاءه


    - لاتغير وتحول شكل الكلمه عن صورتها الطبيعيه لمجرد انك تضبط القافيه

    مثل

    جيتني وتقول ضايع
    ،،،،،،،،،،،،،،جيتني كلك خضوع
    جيت ياشين الطبايع
    ،،،،،،،،،،،،،جيت تسعى للرجوع
    مانفع كثر الدمايع
    ،،،،،،،،،،،،،،وافتهم كانك سموع

    في هذا المثال واضح التكلف الشنيع في تغيير شكل الكلمات لغرض ضبط القافيه
    ففي البيت الأخير غيرت كلمة دموع إلى كلمة دمايع لتتماشى مع القافيه
    و غيرت كلمة تسمع إلى كلمة سموع في آخر البيت لنفس الغرض
    والتغيير اذاكان في هالصوره مثل اللي جا يكحلها عماها
    لاتلجأ لهالأمر أبدا أبدا وتأكد ان لغتنا غنيه جدا بالاضافه إلى تصريفات الكلام الواسعه

    (وهالشي منتشر بكثره هالايام وخصوصا بالفضائيات
    لدرجه يطلع شاعر علي قناه وبقدرة قادر
    يخلي كلمه ((مجال)) تصير ((مجول)) علشان قافيه قصيدته بهالشكل ) <<< والجمهور يصفقله ،،(كلش مو ربعه )

    - تشابه حرفين او ثلاثه لايعني بالظروره ان تكون القافيه سليمه وذكرنا مثال على هالشي


    أمر آخر
    فيه بعض القوافي تكون صعبه ومحدوده خصوصا على المبتدئ
    لذلك حاول قد ماتقدر انك تستخدم قوافي سهله وواسعه ولاتحكر نفسك بقافيه صعبه تحد من تعابيرك
    مثل حروف
    الثاء - الخاء - الذال - الصاد - الضاد - الطاء - الظاء - الغين
    واذا كان ولابد من استخدامها أو انجبرت انك تستخدمها فحاول لاتخليها جامده يعني استخدم قبلها حروف المد الألف والواو والياء


    في النهايه
    لازم تعرف ان القافيه وجدت لتضيف وقع لفظي متناسق للمعنى

    فلا تحاول أبدا انك تخرب معني البيت اللي تكتبه لمجرد انك تخلي القافيه سليمه

    وللموضوع بقيه

  6. #6
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء السادس

    المفردات واهميتها

    الموضوع رقم ((6))

    سنتكلم هذه المره عن المفرده

    وكالعاده هذا الموضوع ماهو الا حلقه من سلسلة مواضيع

    لاتقرا هالموضوع وانت ماقريت المواضيع السابقه لان ماهو الا امتداد لما قبله ولا راح ينفعك بروحه

    والموضوع الرئيسي اللي فيه باقي روابط الموضوعات راح احط رابطه اخر شي

    (والف شكر لشقاوي علي تنسيق الموضوع والروابط والتثبيت)

    ـــــــــــــــــــــــــــــــــــــــ

    الموضوع السادس :

    المفرده وأهميتها

    لكن هل تستحق المفرده أن نخصص لها موضوع بالكامل
    ؟؟
    سأجيب على هذا السؤال في نهاية الموضوع


    في هذا الموضوع سنتكلم عن المحاور التاليه :

    1 - الخطوط الحمراء والممنوعه للمفردات
    2 - اعرف معنى ماتكتب
    3 - معرفه الصفه و الموصوف والحال
    4 - ايحاءات المفرده
    5 - الذكاء باستخدام المفردات
    6 - تكرار المفرده ضعفها وقوتها
    7 - الصوره المكتوبه للمفردات
    8 - التحوير في شكل المفردات
    9 - الوقع اللفظي للمفرده

    ــــــــــــــــــ


    الشرح :


    1 - الخطوط الحمراء والممنوعه للمفردات

    ببساطه ابتعد عن المحرمات وابتعد عن الكلمات النابيه
    مع ان هالنقطه واضحه لكن للتوضيح أكثر
    لاتستخدم صفات الله لغير الله
    ولاتقول بذمتك أو أستحلفك بالكعبه أو بالكتاب أو بالحب
    لأنها تدخل في باب الحلف بغير الله
    ولا تقول انتي آلهة الجمال أو إله الحب
    ولاتقول اعبد خيالك او أسجد لمحياك وماشابهها من صور
    ولا تستخدم آيات قرآنيه أو الأذان في صوره مبتذله
    لان هالامور لها قدسيه ومحاذير
    ( انت شجابرك علي هالامور )

    مثال على هالامر
    شاعر مشهور استخدم اسماء الله الحسنى في قصيدة مدح للامير
    ويقول انت السلام المؤمن ال... ال... الخ
    والطامه انهم صوروها بالتلفزيون وعرضوها وكرروها بكثره
    يعني ما أدري وين كان مخ هالشاعر
    ولا وين عقل المخرج أو المسؤولين عن هذا الأمر الخطير

    اتقوا الله فينا وبأنفسكم

    ـــــــــــــــــ

    2 - اعرف معنى ماتكتب

    حين استخدامك لأي كلمه في تعبيراتك فمن البديهي والواجب أن تعرف معنى الكلمه
    حيث انه لايصح حتا في كلامك العادي أن تستخدم كلمات تجهل معناها
    هذا الأمر رغم كونه بديهي
    إلا أني وجدت الكثير من الشعراء يلجؤون لاستخدام كلمات من الواضح جهلهم بمعناها الحقيقي
    ولمجرد توافقها اللفظي وشكلها المناسب تستخدم
    والغريب أكثر انها تستخدم في أماكن غلط
    والأمثله عديده

    ذكرنا قبل مثال (( نعنبوها ))
    اللي بالاضافه إلي انها شتيمه فتستخدم بأماكن غير مناسبه
    كذلك كلمة (( مهايط ))
    اللي معناها الفعلي غير محبب ورغم ذلك تستخدم

    وكذلك لجأ بعض الشعراء ما أدري ليش
    لمفردات فصيحة لكن في أماكن غلط

    (يمكن لأنهم فطاحل وفطاحل جمع فطحل وفطحل شي ما أعرفه بس شكله مدور)

    صحيح ان البعض استخدمها بصوره مناسبه ولكن البعض لا
    مثل كلمة (( سرمديه )) في الآونه الأخيره

    مع ان علماء اللغه ماقصروا وحطوا معاجم تسهل عليهم الوصول لمعني هالمفردات
    لكن يمكن مايهمهم المعنى

    لا أستفيض هنا فأعتقد ان الفكره وصلت

    ـــــــــــــــــــ

    3 - معرفه الصفه و الموصوف والحال

    لماتوصف شي لازم تعرف الشي اللي توصفه ،،،، صح؟!
    ولازم يكون وصفك سليم
    ولازم تكون الصفه مناسبه للموصوف

    كلام سليم ؟!

    كلنا يعرف الشمس
    والكل يدري ان الشمس تشرق وتغرب وتتوهج وتغيب
    يعني ممكن نقول الشمس غابت أو الشمس ابتوهجها
    لكن مايصير نربطها بصفه غلط أوحاله غلط

    شوف هالمثال

    الشمس هلت وابتدا وقت الاحزان
    ,,,,,,,,,والشمس لاهلت تزيد المواجع

    هل ممكن ان الشمس تهل ؟؟!!
    الكل يدري ان الهلال اللي هو طور من أطوار القمر هو اللي يهل
    أما الشمس تشرق أو تطلع أو تبين لكن ما تهل
    كان بالامكان نقول

    الشمس بانت وابتدا وقت الاحزان
    ,,,,,,,,,والشمس لابانت تزيد المواجع

    ولايصير نقول القمر اشرق
    والعرب قالوا

    طلع البدر علينا من ثنيات الوداع
    ماقالوا أشرق البدر علينا

    مثال آخر

    يابوثمان لينه تشتاق لك روحي
    ,,,,,,,,,والروح لك تشتاق ياعذب الثماني

    شوف التخلف!!؟

    (( الثمان )) أتت بمعنى الأسنان الأماميه
    فتخيل معنى البيت في هالحاله

    أسنان لينه+أسنان عذبه

    شلون صارت ما أدري
    بس هالأخطاء موجوده ومن جهابذة الشعراء
    (وجهابذه نفس موضوع فطاحل بس هذي لونها أخضر)


    ـــــــــــــــــــ

    4 - ايحاءات المفرده

    بعض المفردات تكون لها ايحاءات غير معناها المقصود فأرجو الانتباه لهالمسأله
    مثلا اذا قصيده غزليه
    وفيها صور مثل
    ودي أضمك أو ألمك أو أحضنك
    مرات تكون فيها ايحاءات غير مريحه واحيانا توصل لحد الابتذال
    وبعض الصور مثل
    أنفجر فيك وأصيح
    أنام في حضنك
    أعتقد انها صور سيئه وبعيده عن الشاعريه
    أنا أجزم ان الغالبيه ممن وقع ويقع في هذه الأخطاء لم يكن متعمدا
    لكن وجب عليهم الانتباه لهذه الامور


    ـــــــــــــــــــ

    5 - الذكاء باستخدام المفرده

    فيه كلمات لها عدة معاني أومعناها غير معروف للكل أو مصطلحات غير متداوله وقديمه
    فعلى الشاعر اذا اراد استخدامها
    وكان لابد من استخدامها ان يستخدمها بذكاء وبشكل يوضح معناها المقصود

    لو سألنا هالسؤال

    كلمة الخد ماذا تعني ؟

    تعني خد الانسان صح !؟

    ولها معنى آخر وهو الخد في الأرض

    شوف الذكاء في هذا البيت للأمير خالد الفيصل
    عندما أراد المعنى الثاني للخد لم يترك مجال للاعتقاد بالمعنى الأول

    انورت سودة عسير بخطوتك
    ,,,,,,,,وازهرة من وطيتك خدانها


    ومن الذكاء أيضا

    انك لما تستخدم مفرده تكون واعي لمعانيها الممكنه
    وتضعها بصوره تحتمل أكثر من معنى ولا تخل بالصوره المطلوبه

    مثال

    يا زمرد يا درر ياكنز أسطوري لفاني
    ,,,,,,,,لَفني في ألف ضحكه في سكون معطَّرَه

    شوف كلمة ((لفني)) في بداية الشطر الثاني

    ممكن تقرأ وتفهم لَفني بفتح الالف >>> اي طواني ولفني في الف ضحكه
    وممكن تقرأ وتفهم لِفني بكسر الالف >>> بصيغة طلب او امر اي إطوني في الف ضحكه

    وبالحالتين تكون الصوره حلوه


    ـــــــــــــــــــ

    6 - تكرار المفرده ضعفها وقوتها

    قلنا هالشي بموضوعاتنا السابقه وراح أكرره مره ثانيه
    لاتكرر نفس اللفظ بكثره
    ان تكرار اللفض الواحد بكثره يبعث الملل وكانك مو لاقي الا هالكلمه تعيد وتزيد فيها
    يعني مره قول احبك ومره اهواك ومره متيم ومره اشتاقلك
    كلها تعبر بطريقه او باخري عن الحب ولكن اللفظ اختلف



    ـــــــــــــــــــ

    7 - الصوره المكتوبه للمفرده

    فيه كلمات صورتها المكتوبه تحتمل معاني أو تعطي صور ذهنيه غير المعاني المقصوده

    أنتي عطور الورد وانتي حماره
    ,,,,,,,,وانتي بكفك عطر الازهار شاذي

    في هالبيت صحيح ان المعني والصوره شاعريه وحلوه
    لكن شوف
    انتي حماره في الشطر الاول
    ممكن انها تقرأ حماره
    وتنفهم حماره انثى الحمار
    (مع ان انثى الحمار لغة هي الاتان )
    لكن ممكن تقرأ بالصوره اللي ذكرت

    كذلك آخر البيت كلمة شاذي
    مع ان المعنى المقصود هو الشذى
    لكن معنا شاذي عندنا بالكويت هو القرد الصغير (السعدان)
    شوف الصوره اللي تطري في مخيلتك وانت تقرا هالبيت ( صوره مضحكه )


    مثال مختلف

    أسافر في بلاد الحب واكتب ضحكتك عنوان
    ,,,,,,,,,واحطك للسفر غايه واشوفك أجمل أغراضي

    يعني بيت في منتهى الخيال الشعري

    لكن كلمة أغراضي في آخر البيت لما تقراها
    يطري على بالك امور ثانيه
    ( مواعين وجدور وبطانيات ودلال وكل انواع الأغراض )

    فمن هالأمر لازم الشاعر ينتبه لشكل مفرداته والصور الذهنيه لشكل المفرده


    ـــــــــــــــــــ

    8 - التحوير في شكل المفردات

    يلجأ الشعراء للتحوير في شكل المفردات وتصريفاته وهذا شي طبيعي ومافيه شي

    يعني الصبر تصير صبور أو صابر أو صبرت

    لكن مايصير يقولون صبير او صباير او الصبار !!

    مثال ثاني وراح اربطه بكلمه ثانيه
    زخات المطر أو زخ المطر
    لكن مايجوز يقولون زخيخ المطر أو المطر زاخ أو زخوخ

    لما تحور مفرده خلها في دائرة تصاريفها المقبوله
    ولاتخربها بهدف انك تضبط الوزن او القافيه


    ـــــــــــــــــــ

    9 - الوقع اللفظي للمفرده

    لما تكتب حاول تخلي مفرداتك متناسقه مع الجو العام للقصيده
    يعني تخيل قصيدة عزل شاعريه وكلها شوق وحب وحنين وصور حالمه

    وبعدين بنص القصيده يقول شاعرها

    طيفك اذا جاني لسعني وتكهربت

    !!!

    يعني ممكن هالصوره تستخدم في اطار كوميدي لكن مو بقصيده وجدانيه


    ـــــــــــــــــــ
    ــــــــــــــــــــــــــــ

    ملخص الموضوع

    صحيح انا في نالسلسله من المواضيع نتعلم الشعر ومبتدئين
    لكن يجب ان نبني الاساسات على أرضيه سليمه
    فلذلك توجب علينا تبيان مواضع الضعف والقوه والأخطاء
    وبكل بساطه
    استخدم مفرداتك وكلامك العادي
    واعلم ان قوه القصيده تكمن في تعابيرك الواضحه السهله اللي توصل فكرتك بشكل سليم
    وبعد ماتكتب اللي في بالك راجع اللي كتبت وحاول اتصلح الأخطاء ان وجدت

  7. #7
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    الجزء السابع والاخير

    الوزن بشكل صحيح



    مقدمه :

    قرأت في بعض المواضيع التي تختص بالاوزان وبحور الشعر من وضع السامري والعرضه والقلطه وصنفها بأن كل منها تمثل طاروق أو بحر مستقل !!
    مع ان هالامور ماهي إلا فنون شعبيه ذات طابع غنائي وماهي بحور
    فأنا أستغرب من وين جابوا هالمعلومات المغلوطه وصنفوها كأساس وأرضيه
    والغريب انها منتشره كانها تصنيفات سليمه
    لذلك انا ارجو ممن اراد ان يستفيد من هذه السلسله ان ينسى أي معلومه قرأها في السابق وأن يحاول الالتزام بما يجده هنا وان يأخذ مايقرأه هنا كأساس ومنطلق لمحاولاته اولا
    وكأداه لنقد ونقظ وتعديل ما يقرأه من مواضيع وقصائد

    قرأت في السابق كتب تدرس بحور الشعر للفراهيدي ومواضيع تدعي تعليم الوزن
    وتدرج التفعيله بأنها طريقه للوزن وهذا الامر لا أعتقد بجدواه وخصوصا بقصائدنا الشعبيه المقصوده في مواضيعنا
    وذلك لعدة أسباب من أهمها

    1 - ان الفراهيدي عندما ابتكر علم العروض لم يضعه لكي يوزن الشعر من خلاله بل طريقه للتثبت من صحة الوزن

    2 - ان الفراهيدي ابتكر تلك الطريقه بناءا على أوزان كانت موجوده اصلا
    ( فكيف كان الشعراء قبل الفراهيدي يزنون قصائدهم )

    3 - لصعوبه هذه الطريقه وخصوصا للمبتدئ
    وقد ورد في الاثر:
    أن الأصمعي ذهب إلى الخليل بن أحمد الفراهيدي ليتعلم العروض ومكث فترة فلم يفلح فقال له الخليل
    يوما متلطفا في صرفه:
    قطع هذا البيت
    إذا لم تستطع شيئا فدعه
    ،،،،،،،،،وجاوزه إلى ما تستطيع

    فشرع معه في تقطيعه على قدر معرفته ثم ذهب ولم يرجع وعجب الخليل من فطنته لما قصده في البيت وفهمه له

    4 - عندما وضع الفراهيدي أوزانه القيمه لم تكن شامله لكل اوزان الشعر والدليل اضافة الأخفش لبحر المتدارك اللذي لم يضعه الفراهيدي
    فمالذي يمنع وجود وابتكار أوزان أخرى

    5 - ان تلك الطريقه للشعر باللغه الفصحى
    وترتكز علي النحو والقواعد وتشكيل الكلام بشكل أساسي
    أما الشعر الشعبي فتجده غير ملتزم كليا بالنحو و شكل الكلام
    مما يجيز للشاعر توضيف المفرده حسب الوزن المقصود مالم يخل بمعناها

    6 - لاختلاف اللهجات بين الأقاليم والقبائل
    فمهما كان لدى مستخدم هذا العلم من المام باللهجات سيكون من الصعوبه توضيفه بشكل قاطع

    وكمثال على النقطتين السابقتين كلمة ( عليك )
    ممكن تنطق
    ( عليك ) بمد العين
    أو ( عليك ) بكسر العين
    أو ( عليك ) بفتح الياء
    وأيضا ( علاك )
    و ( اعليك ) بتسكين العين
    وقد يحتج البعض بأن الكثير من القصائد تتسق مع التفعيله وخلال علم العروض
    لكن هذا لايعني بأن القصائد الأخرى مكسوره

    لقد اخرت الكلام عن الوزن إلى هذا الموضوع لقناعتي التامه ان الوزن يأتي مع الممارسه وأن مسألة ضبط الوزن تأتي في المرحله الأخيره لكتابة القصيده مالم يكن الشاعر يمتلك القدره على الوزن مباشره اثناء كتابة الابيات
    وطبعا لاتقرا الموضوع هذا وانت ماقرأت وطبقت اللي في مواضيعنا السابقه
    لان الموضوع هذا تكمله للي قبله ولا راح يفيدك بروحه
    ــــــــــــــــــــــــــــــــــــــــــــــــــ

    موضوعنا سينقسم باذن الله لثلاثة أقسام

    1 - اختيار الوزن

    2 - التأكد من صحة الوزن والاوزان المعروفه

    3 - سهولة التغيير و التعديل في الوزن

    ــــــــــــــــــــــــــــــــــــــــــــــــــ

    1 - اختيار الوزن
    عند تبلور الفكره في مخيلتك وتهم بصياغتها شعرا
    اكتب البيت الأول بالطريقه اللي تطلع معاك ولاتهتم ولا تتساءل بأي بحر ستكتب
    وراح تلقا بعد ماتكتب البيت الأول ان القصيده اختارت بحرها بنفسها
    وكل اللي بيكون عليك انك تلتزم بالبحر اللي طلع معاك
    وهذا هو الوضع الأمثل
    وبطبيعة الحال ممكن انك تختار الوزن اللي تبيه من البدايه وراح أحط الطواريق المشهوره واللي ممكن توزن عليها في النقطه الجايه ولو اني ما أفضل هالطريقه
    مثل ماقلنا الطريقه الأفضل انك تخلي القصيده تختار بحرها

    ــــــــــــــــــــــــــــــــــــــــــــــــــ

    2 - الأوزان الدارجه
    لما تكتب القصيده طبعا راح توزنها بطاروقك ولحنك الخاص
    يعني حاول تشيلها او تغنيها بلحن ثابت واذا مشت سلسه ومتناسقه بالغناء فهي موزونه وعلشان تتأكد أكثر غير اللحن وغنها واستخدم كذا لحن للتأكد
    وكمبتدئ تري ماله أهميه ابدا انك اتعرف هذا بحر هجيني او مسحوب او هلالي او طويل او غيره
    وهذي الحان ثابته اخترتها لكم وقسمتها مجموعات
    كل مجموعه تخدم بحر معين
    كل اللي عليك اتسويه انك تشوف ابياتك تتناسب مع اي لحن وتغنيها بالألحان اللي راح نذكرها

    في هالمجموعات اخترت اللي لقيته من اغاني مشهوره تخدم الأوزان
    في بداية كل مجموعه اخترت بيت من أبياتي يكون ركيزه وأساس لباقي الألحان
    ثم وضعت بعده بعض الألحان اللي تمشي معاه

    المطلوب منك
    تقرا البيت الأول ( الأساس )
    ثم تشيل او تغني هالبيت بالألحان اللي بعده
    وتغير اللحن حسب الالحان الموجوده لكل مجموعه
    وكذلك تشيل البيت في الحن الأول في لحن البيت الثاني
    ثم بلحن البيت اللي بعده وهكذا
    وهالشي بغرض انك تعرف الطريقه اللي نعنيها وتتعود عليها
    والمقصود تشيل قصيدتك بعدت الحان
    ( الشي هذا كرره بكل مجموعه على حسب الحانها المتوفره )

    المجموعه الاولى

    البيت الاساس ( ركيزه لما يليه )
    لوكان لون الورود أسود
    ،،،،،،،،،،، والشمس بالليل مألوفه

    اللحن الأول اغنيه لمحمد عبده
    أيوه قلبي عليك التاع
    ،،،،،،،،،،، مايحتمل غيبتك ليله

    اللحن الثاني اغنيه لمحمد عبده
    احلى من العقد لباسه
    ،،،،،،،،،،، يزهابه العقد في جيده


    المجموعة الثانيه

    البيت الأساس
    ياصباح الجمال وياصباح الورود
    ،،،،،،،،،،، ياصباح السعاده وابتسام الرضيع

    اللحن الأول اغنيه لمحمد عبده
    ياحبيبي حكمت وخل حكمك عدال
    ،،،،،،،،،،، سو بي ما تشا وافعل على ماتريد

    اللحن الثاني اغنيه لمحمد عبده
    ياسحايب سراة أبها تعدي شمال
    ،،،،،،،،،،، واستعيري ادموعي سيلي كل وادي

    المجموعه الثالثه

    البيت الأساس
    حظي مثل قطرة مطر ترتفع فوق
    ،،،،،،،،،، بين السحاب وتالي اتصير بالقاع

    اللحن الأول اغنيه لميحد حمد
    حبيبتي وحيات قلبك وعينك
    ،،،،،،،،،،، مالي سواك انتي ابد حب ثاني

    اللحن الثاني اغنيه لمحمد عبده
    لاتجرحيني جرحك العام ماطاب
    ،،،،،،،،، داوي بحنانك مامضى واجرحيني

    اللحن الثالث اغنيه لمحمد عبده
    يقول من عدى علي راس عالي
    ،،،،،،،،،،، رجمن طويلن يدهله كل قرناس


    المجموعة الرابعه

    الأساس
    البيت له صدرن وعجز وينتهي في قافيه
    ،،،،،،،،،،، يحكم بوزن ايكون واجب نلتزم في وزنته

    اللحن الأول اغنيه لمحمد عبده
    تناسيني بنفس الموعد اللي به ذكرتيني
    ،،،،،،،،،،، أنا ماقدر أعيش اللي بقالي من العمر باوهام

    اللحن الثاني اغنيه لمحمد عبده
    الاواشيب عيني يوم قالوا لي فمان الله
    ،،،،،،،،،،، تحققت انهم من عقب لاماهم مقفيني

    المجموعه الخامسه

    الأساس
    ان سألتيني عن اسباب الغرور
    ،،،،،،،،،،، يكفي اني في حياتك ذكريات

    اللحن الأول اغنيه لطلال مداح
    كل مادقيت في أرض وتد
    ،،،،،،،،،،، من ردات الحظ وافتني حصاه

    اللحن الثاني اغنيه لمحمد عبده
    ياشبيه اصويحبي حسبي عليك
    ،،،،،،،،،،،كل ماناظرت عينك شفت ذاك

    اللحن الثالث اغنيه لمحمد عبده
    لي ثلاث ايام ماجاني خبر
    ،،،،،،،،،،، واعنا قلب المولع واعناه

    المجموعه السادسه

    الأساس
    غايبه يومين والثالث اشوفه يبتدي
    ،،،،،،،، ضاق صدري والصبر مفروض مافيه اجتهاد

    اللحن الأول اغنيه لراشد الماجد
    لمني في محجر اعيونك حبيبي وخلني
    ،،،،،،،،،،، خلني أشوف نفسي في عيونك واطمئن


    المجموعة السابعه

    الأساس
    عطني بعض ماخذت وانسى
    ،،،،،،،،،،، تري العزا في بعض ماخذت

    اللحن الأول اغنيه لراشد الماجد
    لي صاحبن خذني بزينه
    ،،،،،،،،،،،عن كل مزيون ورعبوب

    اللحن الثاني اغنيه لحمد العامري
    تزعل وانا اللي منك زعلان
    ،،،،،،،،،،، تقسى وتجرح قلب مغليك

    اللحن الثالث اغنيه لميحد حمد
    لول معي زايد غلاكم
    ،،،،،،،،،،، أفدي بروحي واشتريكم

    المجموعة الثامنه
    الأساس
    دون علمي تاخذ الروح واتسافر
    ،،،،،،،،،،، في سفرك أسألك بالله لاتبطي

    اللحن الاول اغنيه لمحمد عبده
    أنورت بقدومك الدار ياغالي
    ،،،،،،،،،، واسفرت من عقب ماعاد غايبها

    المجموعة التاسعه
    الأساس
    الجرح جرحي ووصلك يبري الجرحي
    ،،،،،،،،،،،،، وان كان عندك دوا ياصاحبي هاته

    الأول اغنيه لميحد حمد
    ياتاج روحي وقلبي وقطعتن مني
    ،،،،،،،،،،، عتابك أحلى من النسمه على فوادي

    اللحن الثاني اغنيه لعبدالله السليمان
    عذب السجايا وعوده باول الكنه
    ،،،،،،،،،،، متى تزين السوالف وآخذ اعلومه

    المجموعه العاشره
    الأساس
    أنا المحتار باسباب التعاسه
    ،،،،،،،،،،، من أسبابك أو الأسباب أنتي

    اللحن الأول اغنيه لميحد حمد
    تدلل يا قمر ليلي تدلل
    ،،،،،،،،،، وانا لك بالأمر سمعن وطاعه

    اللحن الثاني اغنيه لمحمد عبده
    حياتي كلها صبر وجلاده
    ،،،،،،،،،، وغيري عايشن عيشة سعاده


    ملاحظة
    المجموعات السابقه لاتشمل جميع بحور الشعر ولكن تحوي ماوجدت من الحان
    وهذه المجموعات بمثابة قوالب جاهزه لكي تزن أبياتك خلالها ولتتأكد من صحة وزن ما تكتب

    ــــــــــــــــــــــــــــــــــــــــــــــــــ


    3 - سهولة التغيير و التعديل في الوزن

    في هالنقطه سنختار بيت من الابيات السابقه ونعيد صياغته بعدة أوزان
    والهدف انك تعرف انه في حال وجود بيت مكسور تقدر تغير في بعض المفردات لتصل للوزن الصحيح
    والبيت اللي راح نغير في وزنه هو من المجموعه الاولى وهو

    لو كان لون الورود أسود
    ،،،،،،،،،،،،، والشمس بالليل مألوفه

    و يمكن تحويله إلى وزن المجموعة 3 هكذا
    لو جميع الورود ابلون اسود تكون
    ،،،،،،،،،، او بدا نور قرص الشمس وسط الظلام

    يمكن تحويل هذا البيت إلى وزن المجموعة 2 هكذا
    لو كان كل الورد له لون اسود
    ،،،،،،،،،، والليل نور الشمس فيه امعروفه


    يمكن تحويله إلى وزن المجموعة 4 هكذا
    ألا لو كان لون الورد كل الورد لون اسود
    ،،،،،،،،،،، أو ان الشمس كانت في ليال الناس مألوفه

    يمكن تحويله إلى وزن المجموعة 5 هكذا
    لو يكون الورد في لون السواد
    ،،،،،،،،،،، أو نشوف الشمس في جوف الظلام

    يمكن تحويله إلى وزن المجموعة 6 هكذا
    لو يكون اللون الاسود صار الاوحد بالورود
    ،،،،،،،،،،، أو بدا بالليل قرص الشمس واضح للأنام

    يمكن تحويله إلى وزن المجموعة 7 هكذا
    لو كان لون الورد اسود
    ،،،،،،،،،، والشمس وسط الليل تنشاف

    من اللي سويناه أكيد انك عرفت انه من السهوله انك اتعدل في الوزن وتصلحه
    بعد ماشفت كيف ان تغيير الوزن عمليه سهله وانك ماتحتاج الا لتغيير بعض الاحرف او الكلمات بس انك قدر الامكان توصل للمعنى اللي تبي تقوله



    الملخص
    عشان مايضيعك الكلام اللي فات وعلشان تعرف اللي نعنيه و القصد من الموضوع نقول
    موضوعنا هو الوزن وكيف تزن قصيدتك
    ببساطه عندما تبدأ في الكتابه اكتب اللي في بالك
    وبعد الانتهاء حاول تشوف أي من الألحان السابقه في النقطه 2 يمشي مع اللي كتبت
    ومن خلاله حاول توزن أبياتك
    واذا لقيت ابيات غير موزونه
    حاول توزنها مثل ما وضحنا بالنقطه 3 في انك تغير أو تضيف او تعدل كلمات أو أحرف

    بالنهايه راح تكون قصيدتك موزونه

    طبعا المسأله يحتاجلها تكرار وممارسه
    ولاتتوقع انك من اول محاوله بتنجح استمر وكرر واستشير واكيد بتنجح



    الدروس منقوله من
    الشاعر
    أبوعيسى
    وفقه الله

  8. #8

    تاريخ التسجيل
    20.01.2006
    الدولة
    القصيم - عنيزة
    المشاركات
    12,460
    معدل تقييم المستوى
    10

    ووفقك الله انت والشاعر

    جزاك الله خير


  9. #9
    كاتب مميز
    تاريخ التسجيل
    23.12.2007
    المشاركات
    395
    معدل تقييم المستوى
    13
    موضوع مفيد الله يعطيك العافيه

  10. #10
    كاتب مميز الصورة الرمزية الزاااروط
    تاريخ التسجيل
    22.04.2008
    المشاركات
    346
    معدل تقييم المستوى
    13
    شـكــ وبارك الله فيك ـــرا لك ... لك مني أجمل تحية .

  11. #11
    كاتب متألق
    تاريخ التسجيل
    22.06.2008
    المشاركات
    549
    معدل تقييم المستوى
    13
    موضوع ولا اروع

  12. #12
    كاتب فعال الصورة الرمزية ابو عدي المزيني
    تاريخ التسجيل
    15.11.2008
    المشاركات
    176
    معدل تقييم المستوى
    13
    الله يعطيك العافيه ياراعي الريشا سراحه موضوعك جميل جدا لاكن اسمحلي ببعض التعليق واستقبله بصدر رحب كتابتك للموضوع بمعنى ان الشعر يستطيع ان يكتبه اي انسان والصحيح ان الشعر موهبه من الله واحساس ومشاعر لا يستطيع وصفها وترجمتها غير من وهبه الله الشاعريه الكافيه ولو ان من درس الشعر اصبح شاعر أعتقد ان كل الناس أصبحوا شعار و الله أعلم
    تقبل تحيات أخوك ابو جعيثن

  13. #13
    من كبار الكتاب
    تاريخ التسجيل
    20.01.2006
    المشاركات
    2,527
    معدل تقييم المستوى
    17
    طبعاً موهبه
    ولكن هذه الموهبه لاتنفجر فجأه ويصبح شاعرها من فطاحلة الشعراء في لمحة بصر
    ولكن إذا اراد ان يصبح شاعر يشار له بالبنان عليه بتنمية موهبته بالأطلاع
    وماذكر اعلاه يساعده على تنمية موهبته بصوره سريعه وسليمه ويكون اساسه قوي


    شكرا لك

  14. #14
    كاتب فعال
    تاريخ التسجيل
    01.10.2006
    المشاركات
    160
    معدل تقييم المستوى
    15
    يعطيك العافية موضوع مميز ومتعوب عليه يبيله قراءة مع تركيز
    يسلم الكاتب والناقل

  15. #15
    من كبار الكتاب
    تاريخ التسجيل
    31.07.2008
    الدولة
    الشرائع
    المشاركات
    7,922
    معدل تقييم المستوى
    20
    شـكــ وبارك الله فيك ـــرا لك ... لك مني أجمل تحية .

صفحة 1 من 2 12 الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 2 (0 من الأعضاء و 2 زائر)

المواضيع المتشابهه

  1. (فارس بني عبس) رد على قصيده لفيصل الرياحي
    بواسطة السنافي في المنتدى الــمــنــتـــــدى الـــعـــــــــــام
    مشاركات: 12
    آخر مشاركة: 14.06.2008, 02:24 PM
  2. يامن تكتب في القسم الأسلامي....
    بواسطة أبو نواف في المنتدى الــمــنــتـــــدى الـــعـــــــــــام
    مشاركات: 6
    آخر مشاركة: 30.03.2008, 10:23 AM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •