الاخوه الكرام
ماسوف أتحدث عنه ليس قصه من نسج الخيال
بل قصه واقعيه طلب صاحبها شخصيا
أن اعرضها عليكم
لتدعوا له ولي ولعموم المسلمين
فأرجوا منكم ذلك
................
بسم الله الرحمن الرحيم
كتبت موضوع سابق أعتقد انكم تعلمونه وقد قرائتموه جميعا
وقد حددت فيه نسبة ربح أي مربي بنسبه مئويه
35% من رأس المال
المهم الموضوع هو كالتالي
حدثني رجل أعرفه شخصيا وقد قراء الموضوع السابق
وقال لي: أبو تركي عندي حلال 900 رأس دافع فيه تقريبا مليون وستمائة الف ريال تقريبا وارباحي لا تزيد عن 350 الف ريال بالسنه
قالت له: استحاله
قال: هذا اللي صاير
قلت: اسمع بقولك شي سويه بدون ما أسألك بأي شي ثاني
قال: تفضل
قلت: بعطيك شي واحد فقط تسويه وردلي بعد 6 شهور وخلك على شغلك لا تغير شي
قال: ابشر
قلت: رح لأقرب محل يبيع أرقام الحلال وابيك ترقم بس الحلال اللي ولد عندك
قال: والحلال اللي مولد اللحين ارقمه والا بس الحلال اللي يولد من الآن
قلت: لا الحلال اللي مولد الآن رقمه واتبع معه كل شاه تولد رقمها
قال: طيب
المهم الرجال بدأ يرقم الحلال عنده ودق على بعد ست شهور
قال: ابشرك رقمنا الحلال اللي ولد كله
قلت: طيب انا جاي للمزرعه بمر عليك أن شاء الله
المهم يا شباب
مريت عليه ولقيت المصيبه اللي توقعتها بالضبط
يا اخوان
نصيحه للاخوان اللي يربون الحلال انهم يراعون الله في حلالهم وحلال عيالهم
الاستهتار وعدم المبالاه ماهي صفه للتاجر والمربي
يا اخوان
تخيلوا 900 رأس ما يولد منها إلا تقريبا 489 رأس فقط منها 140 رأس ولدت للمره الثانيه أثناء فترة التجربه
يعني 411 رأس تآكل وتشرب بلوشي
علما بأن الرجال يزرع برسيم يعني تكلفة البرسيم عليه تقريبا 8 ريال فقط ومع كذا ما يربح إلا 20 % فقط
يعني أقل من اقل نسبه محددها لأي مربي يشتري برسيمه من السوق
لكن هذا الشخص عنده مشكله ثانيه
الحلال اللي مايولد عنده ماشاء الله سمان وصحتهن أكثر من ممتازه
واكثركم يعرف أن الشاه السمينه ماتمسك هذا إذا قدر عليها الفحل اصلا
والوناسة بالله عنده مشكله ثالله
فحوله عددها 18 رأس فقط وهذا عدد غير كافي إطلاقا والمعروف أن كل 30 شاه تبيلها أقل شي فحل يعني اخونا محتاج 30 فحل أقل شي
وبرضوه اخونا عنده مشكله رابعه
البهم عنده ماهو طيب لا جرم ولا شعره والسبب انه تارك أسوء فحوله بشبك الشياه المطافيل يعني تلقح منهن قبل ما تروح للفحول الطيبه الموجوده بشبك الجلد
المهم تم إعطائه الرأي وهو كالتالي
عزل الشياه اللي ما ولدت أبد والغير مرقمه بشبك مستقل ومعها 20 فحل طبعا بعد مايشتري فحول جديده
تقليل الضرمه لجميع الشياه الغير مرقمه حتى تخسر الكثير من وزنها
الاهتمام في تغذيه الشياه المرقمه واللي ولدت عنده سابقا وعدم ضمها للشياه اللي ماولدت وتركها بشبك مستقل وترك معها 13 فحل
ومتابعة الترقيم لمدة 6 شهور لاحقه لمعرفة الشياه اللي تولد من الشياه اللي ماولدت عنده سابقا
وان تحسنت الولاده عنده بشكل جيد والا وجب عليه التخلص من جميع الشياه اللي ماولدت عنده من الشياه الغير مرقمه سابقا
وعدم إهدار ماله وجهده على معالجة عدم التلقيح
والنتيجه
الإهمال يا اخوان مضر جدا على المربي
وأكاد أجزم أن الأشخاص الذين يملكون الأعداد الكبيره عندهم نفس المشكله تقريبا
ارجوا من الله أن يوفق الجميع لما يحبه ويرضاهالمصدر: منـتـديات أغـــنـامkwdpi>>>> j[vfi>>>> rwi ,hrudi j[vfi kwdpi
المفضلات