المساعد الشخصي الرقمي

مشاهدة النسخة كاملة : تكفون يا لنشامى العنز انهبلت ...



بيضانثيل
07.12.2013, 11:26 PM
السلام عليكم .. الله يمسيكم بالخير
ياجماعة الخير . عندي عنز من النوع الفاخر انهبلت . حركاتها غريبه تناظر فوق وتدور بمكانها واذا لحقتها تركض وتدور وتطيح وتركض ورجلينها تسبق يدينها . وانا اول مره اشوف مثل هالحاله. سألت واحد من اهل الخبره . وقال هذا مرض يقال له ( الطــــير ) .
رحت للبيطري عطاني نوعين ابر لمدة 3 أيام بس مافيه فايدة والعنز شانت ونقص وزنها ولاهيب زينة .
قال لي بعض الشيبان إن فيه علاج بالكي مع الرأس .
عاد أنتم وش رايكم يا أصحاب الخبرة ..

عوضلله
08.12.2013, 01:01 AM
ماورئ كلام الشياب شي

ابو طلول1400
08.12.2013, 01:23 AM
السلام عليكم
الحاله هذي حصلت لشاه عندي وخذيت علاج ولا نفع وحطيت الميسم في الضو وكويتها في نص الراس من فوق وطابت ورجع لها نفس المرض بعد سنه ونص
لكن تأخرنا في الكي وماتت لكن استعجل في الكي قبل لا يتمكن منها
وسلامتك

حسين انو احمد
08.12.2013, 11:59 AM
عطها بي كمبلكس 20 سم وراح تقوم بالسلامه ان شاء الله

بيضانثيل
08.12.2013, 02:19 PM
السلام عليكم ..
الله يجزاكم خير ..
اخوي ابوطلول الله يرضى عليك . ماقلت لي كيف الطريقه بالضبط ومع اي مكان بالراس . هل هو بين القرون اوورى شوي .وهل يكفي مطرق واحد او اثنين او اكثر .. المعذره على الاطاله ..

عذب الكويت
08.12.2013, 05:11 PM
هذا مرض الطير عطها 5 سم بي كمبيليكس و5سم كوربرول مدة 5 ايام واذا الحاله صعبه عطها درب دوفلاية بالوريرد واحقن البي كمبليكس والكوربرول داخل الدرب

ابو طلول1400
08.12.2013, 08:44 PM
تكويها بين القرون وتسحبها قدام إلى فوق العيون
وآسفين على التأخير

بيضانثيل
08.12.2013, 11:08 PM
الله يجزاكم خير .. اشكرك اخوي ابوطلول ولايهونون الربع .
عندي سؤال اخير اذا سمحتولي ...
هل هذا المرض معدي او غير معدي

فتى الدوادمي
09.12.2013, 04:55 AM
غير معدي حسب كذا حاله جت عندي وعالجتها بالكي بعد توفيق الله

كدااااد
09.12.2013, 10:46 AM
نعم هذا الطير

العلاج مثل ماذكر الاخوان ( هذا مرض الطير عطها 5 سم بي كمبيليكس و5سم كوربرول مدة 5 ايام واذا الحاله صعبه عطها درب دوفلاية بالوريرد واحقن البي كمبليكس والكوربرول داخل الدرب)مابين القوسين من مشاركة عذب الكويت

الكي نعم علاج لكن لازم السيخ يكون حامي جدا احمر وفي هامة الراس تحط خطين متقاطعين كل خط تثبت الميسم 3 ثواني عد من 123

تقول هل المرض معدي لا ماهو معدي لكن ممكن يصيب باقي القطيع لان المرض ينتج عن نقص فتمينات ومعادن

ماجد..
09.12.2013, 06:04 PM
هذ المرض نسبة شفائه ضئيله يعني من العشر يادوب يسلم وحده سبب المرض من الكتمه وضيق االمكان الي تنام فيه
انا شفيت عندي حاله من الله سبحانه اعطيتها ابرة ايفوميك 3 سنتي تحت الجلد وابرة خافض حراره وسحبت 10ملي ديزل وصبيته بالانف بالفتحتين 5ملي 5ملي واليوم الثاني هكسازول تركيز30 والحمدالله تدريجين لين شفيت الديزل مره وحده يستخدم فقط

ماجد..
09.12.2013, 06:06 PM
الكي ماله اي فايده جربته ب5 حالات ولا فاد لوتفكر كيف يوصل الكي جوت الدماغ انت تكوي الراس كله عضم والبلا بدماغ لازم دوا

بيضانثيل
09.12.2013, 10:52 PM
اشكر جميع اخواني اللي فزعوا لي بتوجيهاتهم ولا اقدر اقول الا الله يجزاكم خير ..
كما اسأل الله عز وجل ان يغفر لوالدي ووالديكم ويرحمهم وجميع اخواننا المسلمين ...

مغربي200
11.12.2013, 01:37 PM
اخي بالنسبة لمرض الطيرة يمكن تتعرف عليه بسهولة خد حفنة تراب وصبه في اذت النعجة ان هي حركت اذنيه لاسقاطه هو ليس طيرة وان بقي فهو طيرة واخي انصحك الا تتعب نفسك في الكي او العلاجات بلا فائدة لانه ليس له علاج ابدا يا اخي والله يخلف ان شاء الله لان النعجة تبقى تدور وتسقط وتهزل وتموت الله يعوضك خيرا منها

أبوعزام@
11.12.2013, 04:49 PM
مرض الطير لو اكتشفته مبكر نسبة النجاة فيه كبيره ولكن لو اكتشفته
متأخر عليك بالكوي وزد جرعة الدوا اللي قالوها الاخوان 10 مل كل نوع دبل للحالات المتأخره